Mnr Pieter Hinsbeeck is pas aangestel as departementshoof senior fase by Laerskool Barberton. Sy passie is vir wiskunde en hy gee die betrokke vak al sedert 2005 toe hy as jong onderwyser by HTS Ligbron in Ermelo sy onderwysloopbaan begin het.
Sedert 2005 het hy twee jaar in London, Engeland skoolgehou, by Laerskool Laeveld, Laerskool Thabazimbi en Curro Nelspruit. Hy word bevorder tot departementshoof opvoedkundige leiding by Laerskool Laeaveld in 2005. Buiten wiskunde, het Mnr. Hinsbeeck ook al landbouwetenskappe en IGO vir gr. 8 – 12 gegee.
Mnr. Hinsbeeck is opgewonde om op alle gebiede by die laerskool betrokke te raak. Hy glo dat elke fasset van ‘n skool kan dien as onderrig platform, waar die normes, waardes en dissipline wat kinders in hulle toekoms gaan nodig hê, vasgelê kan word.
Hy het ‘n passie vir sport, veral krieket wat na aan sy hart lê. Hy sal krieket en rugby afrig en wil ‘n liefde vir sport by kinders kweek met die klem op spanwerk, om gesonde sosiale interaksie by die leerders te vestig.
“Ek wil graag my kennis en ervaring in die Wiskunde en Wetenskap department gebruik om kinders vaardighede aan te leer soos selfvertroue, kreatiwiteit en verantwoordelikheid. Die boompies wat aan ons gegee word is nog jonk en dit is die onderwysers by Laerskool Barberton se plig om daardie boompies te snoei en te vorm om wanneer hulle groter bome is vrug te dra tot voordeel van die wyer gemeenskap,” het hy gesê.