Laerskool Barberton wat knus geleë is aan die voet van die Makhonjwaberge is vanjaar 120 jaar oud. Alhoewel daar onderrig in Barberton plaasgevind het sedert die vroegste ontwikkeling van die dorp in 1897 is die amptelike hoeksteen van die skool eers onthul in 1903. Laerskool Barberton is een van die oudste skole in die Laeveld.
Voor 1897 was daar verskeie privaatskole in Barberton, maar dit is nie duidelik wanneer die eerste staatskool geopen is nie. Dit word algemeen aanvaar dat dit in 1898 was en in die Gold Fields News and Barberton Herald van Desember 22, 1896 staan daar: “Dr Mansveldt has lost no time in giving effect to his promises regarding the new Government School here.”
Om die skool se verjaarsdag te herdenk word daar verskeie aktiwiteite en feesvieringe beplan in die loop van 2023. Die feeskomitee van die skool is reeds besig om datums vas te maak en daar gaan ‘n geleidelike opbou wees tot en met Augustus, wanneer die amptelike feesnaweek plaasvind.
Van die aktiwiteite wat beplan word is ‘n gholfdag (4 Aug), Ma en dogterdag (5 Aug), Mini Hokkietoernooi en Vintage Karuitstalling (12 Aug), feesnaweek (17 – 19 Aug) en ‘n formele gemaskerde bal in November. Gaan stof solank daai manelpak af en haal die bling-bling rok uit die mottegif verpakking.
Tydens die feesnaweek sal Bouwerpark, die sportterrein van die laerskool, omskep word in ‘n fees van aktiwiteite en stalletjies. Dit spreek vanself dat besoekers in die aande getrakteer sal word op musiek deur gewilde Suid-Afrikaanse sangers.
Die skool beplan ook ‘n feesbylaag wat in die Laevelder gepubliseer gaan word.
Voorlopig wil ons ‘n versoek aan alle oud Barberton leerlinge en onderwysers rig en vra dat julle enige ou foto’s en staaltjies vir ons sal epos, met natuurlik jou toestemming dat ons dit in sosiale media en in ons feesblad mag gebruik.
Stuur dit asb aan Lynette Spencer per epos na lspencer@laerskoolbarberton.co.za of plaas dit in ‘n koevert en lewer by die kantoor van die skool af. Verkondig dit ook asb wyd sodat ons soveel as moontlik oud Barbertonners kan betrek.
Foto’s:
Eerste Elementary Skool – Die eerste gebou waarin die “Elementary” Skool gehuisves is.
